Rossiya aholisi keskin kamayishda davom etmoqda
Demografik inqiroz pandemiya davrida kuchaygan va hozir ham davom etmoqda. Yarim asrdan keyin RF aholisi 120 milliongacha tushib ketishi mumkin.
Rossiya aholisi keskin kamayib bormoqda. Bu haqda Economist yozdi.
Nashr maʼlumotlariga ko‘ra, bu Covid-19 pandemiyasining boshlang‘ich davrida boshlangan va Ukraina urushi davrida kuchaygan. Jumladan, 500 mingdan 2 milliongacha bo‘lgan rossiyaliklar xorijga ko‘chib ketgan. Rasmiy maʼlumotlarda 2022 yilda Rossiyani 10 foiz ishchi kuchi tark etgani qayd etildi.
RF aholisi 1994 yilda eng yuqori cho‘qqiga chiqqandi. O‘sha yili mamlakatda 149 million odam yashagan. BMTning 2021 yilgi tahlilida Qrim hududisiz 145 million odam istiqomat qilishi aytilgan.
Agar shu tendensiya saqlanib qolsa, yarim asrdan keyin Rossiya aholisi 120 million kishini tashkil etadi. Bu mamlakatni aholi soni bo‘yicha 15-davlatga aylantiradi (1995-yilda 6-o‘rin).
Rossiyalik demograflarning qayd etishicha, o‘tgan yili aprelda ro‘yxatga olingan tug‘ilishlar soni XVIII asrdan buyon eng past ko‘rsatkich bo‘ldi.
Rosstat maʼlumotlariga ko‘ra, 2020-2021 yillarda Mamlakat aholisi 1.3 millionga kamaygan. O‘lim holatlari esa tug‘ilishga nisbatan 1.7 millionga ko‘p bo‘ldi. Etnik ruslarning ulushi 78 foizdan 72 foizgacha qisqardi.
