Bo‘kada Salavkiylar sarkardasining noyob ko‘zasi topildi
U qadimgi yunon anʼanasiga mos ravishda ishlangan.
Toshkent viloyati Bo‘ka tumanidan tuxumsimon 2 ta xum va 2 ta Toshkent vohasining o‘rta asrlarga oid arxeologik yodgorliklariga tegishli ashyolar topildi. Bu haqida O‘zbekiston Fanlar akademiyasi xabar bermoqda.
Qayd etilishicha, topilgan tarixiy ashyolar orasida sirtiga ayol qiyofasi bo‘rttirib gavdalantirilgan toshbaqasimon ko‘za noyobdir. Bunday idish Toshkent viloyatida ilk bor topildi. U qadimgi yunon anʼanasiga mos ravishda ishlangan.
Bu qadimgi Choch-Toshkent hududiga salavkiylar sarkardasi Demodamning (miloddan avvalgi III asr) kelishi bilan bog‘liq bo‘lishi mumkin. Idishda yunon maʼbudasining tasviri o‘z aksini topgan. Xuddi shunday qiyofa Turkiyada miloddan avvalgi II asrda qurilgan Apollon ibodatxonasida ham bor.
