Farg‘onada IIB xodimini haqorat qilgan ayolga chora ko‘rildi
U profilaktika inspektorining qonuniy talablariga bo‘ysunmagan.
Ijtimoiy tarmoqda Farg‘ona shahrida ayol kishining IIO xodimini haqorat qilayotgani aks etgan videoxabar tarqaldi. Holat yuzasidan viloyat IIB rasmiy munosabat bildirdi.
Maʼlum bo‘lishicha, joriy yilning 10 mart kuni Farg‘ona shahar IIO FMB navbatchilik qismiga shaharning Yangi asr ko‘chasida yashovchi S.O (ayol) murojaat qilib, qo‘shnisi D.K (videoxabardagi so‘kinayotgan ayol) uni turli so‘zlar bilan haqorat qilayotganligi sababli yashash xonadoniga IIB xodimi kelishini so‘ragan.
Murojaat bo‘yicha profilaktika inspektori Yo.M. aytilgan manzilga borib, D.K.ni tinchlantirmoqchi bo‘lgan. Ayol esa profilaktika inspektorining qonuniy talablariga bo‘ysunmay, uning shaʼni va qadr qimmatini kamsituvchi so‘zlar bilan haqorat qilgan.
Mazkur holat yuzasidan shu kunning o‘zida D.K.ga nisbatan tegishli tartibda hujjatlar rasmiylashtirilib, prokuratura organlariga yuborish choralari ko‘rilgan.
