Samarqandda o‘qituvchi 6-sinf o‘quvchisiga tegajog‘lik qilgani aytildi
Shundan so‘ng qizning otasi va o‘qituvchi o‘rtasida janjal yuz bergan.
Ijtimoiy tarmoqda Samarqand viloyatining Kattaqo‘rg‘on tumanida maktab o‘qituvchisi o‘quvchiga tegajoqlik qilgani va qiz uksus ichib, kasalxonada yotgani haqida xabarlar tarqaldi. Holatga tuman IIB rasmiy izoh berdi.
Maʼlum bo‘lishicha, joriy yil 10-fevral kuni Kattaqo‘rg‘on tumanidagi maktabda sinf rahbari sifatida ishlab kelayotgan o‘qituvchi voyaga yetmagan 6-sinf o‘quvchisi 4 kun dars qoldirgani sababli undan otasini chaqirishini so‘ragan.
Birozdan so‘ng maktabga o‘quvchining onasi kelgan. U bilan maktab maʼmuriyati gaplashib, qizining muntazam ravishda dars qoldiryotganini tushuntirib, tushuntirish xati yozib berishini so‘ragan. Ayol “hech narsa yozib bermayman” deb maktabdan chiqib ketgan va turmush o‘rtog‘iga qiziga o‘qituvchisi tegajog‘lik qilganini aytgan. Shundan keyin qizning otasi maktabga kelib, sinfxonada guruh rahbariga baqirib uni qo‘pol so‘zlar bilan haqorat qilgan va yoqasidan tortib janjal ko‘targan.
Qizning onasi hamda o‘quvchi qizning tushuntirish xatida o‘qituvchining tegajog‘lik qilgani to‘g‘risidagi vajlari o‘z tasdig‘ini topmagan.
Qizning otasining xatti-harakatida Maʼmuriy javobgarlik to‘g‘risidagi kodeksning 183-moddasi (mayda bezorilik), onasinikida esa 40-moddasida (tuhmat) nazarda tutilgan huquqbuzarlik alomatlari borligi sababli to‘plangan hujjatlar qonuniy qaror qabul qilish uchun JIB Kattaqo‘rg‘on tuman sudiga yuborilgan. Sud organi tomonidan o‘quvchining ota-onasiga nisbatan jarima jazosi qo‘llangan.
