Politico: Xitoy Rossiyaga minglab miltiq va bronejilet yetkazib bergan
Maʼlumotlarga ko‘ra, Pekin hozirda Moskvaga qurol sotmayapti. Ammo ikki maqsadli tovarlar eksporti davom etmoqda.
Xitoy kompaniyalari Rossiyaga eng kamida mingta avtomat, shuningdek, turli amunitsiya va qurilmalar yetkazib bergan. Politico nashri maʼlumotlariga ko‘ra, ushbu qurilmalardan qurol sifatida foydalanish mumkin.
Import Genius bojxona maʼlumotlari agregatori tahlillarida ko‘rsatilishicha, bu korxonalarning eng kamida bittasi Xitoy davlati bilan bog‘liq. Gap China North Industries Group Corporation Limited haqida ketmoqda. U 2022 yilda RFning “Texkrim” kompaniyasiga CQ-A shturm miltiqlarini yetkazib bergan. Hujjatlarda u “ov miltig‘i” sifatida ko‘rsatilgan.
Maqolada ushbu miltiqlar Ukrainada ishlatilgani haqida aniq maʼlumotlar yo‘qligi taʼkidlangan. Ammo bu yerda Da-Jiang Innovations Science & Technology Co kompaniyasiga tegishli DJI dronlari topilgan. Bu kompaniyaga qarshi AQSH sanksiyalar joriy etgan.
Xitoydan Rossiyaga kirayotgan ikki maqsadli tovarlar
RF qo‘lga kiritishi mumkin bo‘lgan qurilmalar orasida Xitoyda ishlab chiqarilgan dron detallarini ko‘rsatish mumkin. u o‘z ichiga akkumlyator va kameralarni ham oladi. Tovarlar Rossiyaga BAA orqali eksport qilingan. Bundan tashqari, xitoyliklar 12 tonna bronejiletlarni Turkiya orqali yetkazib bergan bo‘lishi mumkin.
Mavjud maʼlumotlarga ko‘ra, Pekin Moskvaga katta miqdorda qurol sotmayapti. Ammo jurnalistlarning aniqlashicha, ikki maqsadli tovarlar — harbiy maqsadlarda foydalanish mumkin bo‘lgan fuqarolik texnologiyalarini yetkazib beryapti.
Bundan oldin AQSH bir necha bor Xitoyni RFga qurol yetkazib berish oqibatlaridan ogohlantirgandi.
