Bozorlarda 50 dan ortiq mahsulot texnik talabga javob bermasligi aniqlandi

 

Bozorlardagi 51 ta mahsulotning texnik talablarga javob bermasligi aniqlandi. Bu haqda «O‘zA» axborot agentligi xabar bermoqda.

 

Qayd etilishicha, Raqobatni rivojlantirish va isteʼmolchilar huquqlarini himoya qilish qo‘mitasi tomonidan “Isteʼmolchilar huquqlarini himoya qilish: muammo va yechimlar” mavzuida konferensiya o‘tkazilgan.

 

Dastlab O‘zbekiston hamda xalqaro tashkilotlar rahbar va masʼullarining sohaga doir taqdimotlari bo‘lib o‘tdi. Dori vositalari va biologik faol qo‘shimchalar reklamasi, reklama va to‘g‘ri marketing yondashuvining ahamiyati, moliyaviy xizmatlarda isteʼmolchilarning huquqlari yuzasidan fikr-mulohazalar bildirildi.   

 

Taʼkidlanishicha, tovarlar xavfsizligi va ularning sifatini nazorat qilish maqsadida muntazam ravishda chakana savdoda nazorat tadbirlari hamda ularni ekspertizadan o‘tkazish ishlari yo‘lga qo‘yilgan. 

 

Shunga ko‘ra, jami 242 nomdagi (50 turdagi) mahsulotlarning nazorat xaridi amalga oshirilib («Sifat nazorati» teleko‘rsatuvi bilan hamkorlikda), ularni ekspertizadan o‘tkazish natijalariga ko‘ra, 51 nomdagi mahsulotlar normativ-texnik hujjatlar talablariga javob bermasligi aniqlangan.  

 

Konferensiyada Germaniya tashkiloti bilan hamkorlikda oliy taʼlim muassasalari talabalari o‘rtasida tashkil etilgan “Moliyaviy savodxon yosh isteʼmolchi” onlayn olimpiadasi g‘oliblari taqdirlandi.