Parkentda kuchli yog‘ingarchilik sabab 47 kishi adirda qolib ketdi
FVB ularni qutqarish uchun 7 ta maxsus texnika yuborgan.
Kecha, 20-mart kuni Toshkent viloyatining Parkent tumanida salkam 50 kishi dam olish uchun adirga chiqib, kuchli yog‘ingarchilik sabab pastga tusholmay qolib ketdi. Holat yuzasidan Favqulodda vaziyatlar vazirligi maʼlumot berdi.
Qayd etilishicha, Parkent tumani Qiziltog‘ shaharchasi atrofidagi adirliklarga o‘z avtomobillarida dam olish maqsadida borgan fuqarolar kuchli yomg‘ir yog‘ishi natijasida adirliklarda qolib ketgan va pastga tusholmay qolgan.
Qutqaruvchilar 7 ta maxsus texnika bilan aytilgan manzilga yetib borib, qidiruv-qutqaruv ishlarini olib borgan. Shundan so‘ng dam oluvchilarning 13 ta yengil turdagi avtoulovlari hamda 47 nafar fuqaro xavfsiz joyga olib tushilgan.
Yuzaga kelgan vaziyat oqibatida halok bo‘lgan va tan jarohat olgan fuqarolar yo‘q.
