Zilziladan aziyat chekkan Turkiya va Suriya uchun 7 mlrd yevro yig‘ildi
Bryusselda ushbu masalaga bag‘ishlangan donorlar konferensiyasi bo‘lib o‘tdi.
Bryusselda bo‘lib o‘tgan xalqaro donorlar konferensiyasida Turkiya va Suriyadagi zilzila oqibatlarini bartaraf etish uchun 7 milliard yevro yig‘ildi. Yevrokomissiya Raisi Ursula fon der Lyayyenning so‘zlariga ko‘ra, bu barcha taxminlardan “oshib ketdi”.
“Xalqaro hamjamiyat Turkiya va Suriyani qayta tiklashni qatʼiy qo‘llab-quvvatlayotganini ko‘rishdan xursandman”, – degan u Shvetsiya bosh vaziri Ulf Kristersson bilan matbuot anjumanida.
Bundan oldin fon der Lyayyen Birgina YeI Turkiya tiklanishi uchun 1 milliard yevro ajratishini eʼlon qilgandi. Qo‘shimcha 108 million yevro esa Suriyaga gumanitar yordam sifatida yo‘naltiriladi.
“Millionlab odamlar uysiz qoldi va davom etayotgan qish mavsumida chodirlarda yashamoqda. Tiklanishni tezlashtirish uchun barcha resurslarni safarbar qilishimiz kerak. Uylar, maktab va shifoxonalar seysmik xavfsizlikning eng yuqori talablariga javob beradigan qilib qayta qurilishi kerak. Suv taʼminoti, sanitar va boshqa muhim infratuzilma taʼmirlanishi zarur. Davlat idoralari va korxonalari faoliyati tiklanishi uchun kapitalga muhtoj”, – degan YeK raisi.
Bundan oldin Turkiya prezidenti Rajab Toyyib Erdog‘an mamlakat zilzila oqibatida 104 milliard dollar zarar ko‘rganini aytgandi. Hozirga qadar Turkiya va Suriyada zilzila qurbonlari soni 50 mingdan oshib ketdi.
