LOT Polish Airlines Polshadan Toshkentga parvozlarni yo‘lga qo‘ydi
Yangi yo‘nalishda reyslar har 10 kunda bir marta amalga oshiriladi.
Kecha, 21 mart kuni mahalliy vaqt bilan soat 18:03 da Polshaning “LOT Polish Airlines” aviakompaniyasining samolyoti Toshkent xalqaro aeroportiga qo‘ndi va yangi Varshava — Toshkent — Varshava yo‘lovchi yo‘nalishini ochdi. Bu haqda “Uzbekistan airports” xabar berdi.
Anʼanaga ko‘ra, Boeing 787 Dreamliner suv arkasi bilan tantanali ravishda kutib olindi. Ekipaj va yo‘lovchilarni karnay va surnay sadolari ostida “Uzbekistan airports” kompaniyasi rahbariyati, Polshaning O‘zbekistondagi elchisi, Turizm va Transport vazirliklari vakillari, shuningdek, «Flyinʼup» kompaniyasi rahbariyati gullar bilan kutib oldi.
Iyun oyining o‘rtalariga qadar har 10 kunda bir marta charter asosida parvozlar amalga oshiriladi. Qishki jadvalga o‘tish munosabati bilan aviakompaniya Varshava — Toshkent — Varshava yo‘nalishi bo‘yicha muntazam qatnovlarga o‘tishga umid qilmoqda.
LOT Polish Airlines — shtab-kvartirasi Varshavada joylashgan Polsha aviakompaniyasi. Aviakompaniya dunyodagi eng qadimgi, eng yirik va vakillik aviatsiya alyansi bo‘lgan “Star Alliance” aʼzosi hisoblanadi.
