Saida Mirziyoyeva AQSHdagi o‘zbekistonliklar bilan uchrashib, ularni Navro‘z bilan tabrikladi
Uchrashuvda Nyu-York meri ham qatnashgan.
Saida Mirziyoyeva Nyu-York shahrida o‘zbek diasporasi vakillari bilan uchrashdi. Bu haqda u o‘zining rasmiy Telegram-kanalida maʼlum qildi.
Uchrashuvda Nyu-York meri Erik Adams ham qatnashgan.
"Vatandoshlarimiz bilan juda iliq suhbatlashdik. Ularga yurtimizda amalga oshirilayotgan ulkan islohotlar haqida so‘zlab berdim va ularning ham yurtimizda yuz berayotgan o‘zgarishlarga katta qiziqish bilan qarayotganiga guvoh bo‘ldim.
Yurtdoshlarimizning aksariyati o‘z tarixiy Vatanidan uzoqlashmagani, turli loyihalarni amalga oshirish orqali AQSH va O‘zbekiston o‘rtasidagi madaniy, siyosiy va iqtisodiy aloqalarni mustahkamlashga intilayotganligi juda quvonarli.
Ota uyidan minglab kilometr olisda bo‘lsa-da, Vatanimizga nafi tegayotgan ana shunday hamyurtlarimizdan minnatdorman", - deydi Mirziyoyeva.
