Bo‘kada fuqaroni sarson qilgan masʼullar ishdan olindi
Ular birinchi guruh nogironi bo‘lgan fuqaroning murojaatini eʼtiborsiz qoldirib, uni yolg‘on vaʼdalar bilan aldab kelishgan.
Toshkent viloyatining Bo‘ka tumanida murojaatchi bilan ishlashda yuzaga kelgan boshboshdoqlik sabab uch nafar masʼul ishdan olindi. Bu haqda viloyat hokimligi axborot xizmati xabar berdi.
Kecha, 25 mart kuni Nurafshon shahrida Toshkent viloyati hokimi Zoyir Mirzayev shoshilinch yig‘ilish o‘tkazgan. Unda Bo‘ka tumani «Yangibog‘» MFYda istiqomat qiluvchi fuqaro Muzaffar Haydarovning murojaati nima sababdan sansolarlikka uchragani tegishli mutasaddilar ishtirokida muhokama qilingan.
Maʼlum bo‘lishicha, birinchi guruh nogironi bo‘lgan fuqaroning murojaati Bo‘ka tumanidagi ayrim mansabdorlar tomonidan eʼtiborsiz qoldirilgan. Xususan, “Dehqon xo‘jaliklari tashkil etishni qo‘llab-quvvatlash orqali aholi daromadlarini oshirish bo‘yicha qo‘shimcha chora-tadbirlar to‘g‘risida”gi Prezident qarori talablariga rioya qilinmagan, auksion orqali olingan yer o‘z vaqtida ajratib berilmagan va sansolarlikka yo‘l qo‘yilgan.
Bo‘ka tumani hokimligining umumiy bo‘limi mudiri o‘zini viloyat hokimining yordamchisi, deb tanishtirgan hamda murojaatchini yolg‘on vaʼdalar bilan bir necha marta aldab kelgan. Mahallada faoliyat olib borayotgan hokim yordamchisi vaziyatni yumshatish, fuqaroga yordam berish o‘rniga shu paytgacha aldab kelgan. Shu tariqa auksionda yutib olingan yerga bahorgi ekin ekish, yerni tayyorlash kechikmoqda.
Vaziyat bo‘yicha masʼullarga tegishincha jazo choralari qo‘llanib, 3 nafar mansabdor egallab turgan lavozimidan ozod qilingan va bir kishiga hayfsan berilgan.
