Zangiotada “ozdiruvchi dori” sifatida sotilayotgan psixotrop vositalar aniqlandi
Tarkibida kuchli taʼsir etuvchi moddalar bo‘lgan mazkur dorilar qozog‘istonlik fuqaro tomonidan yetkazib berilgan.
Toshkent viloyatining Zangiota tumanida 20 xilga yaqin turli nom va ko‘rinishdagi jami 108 ming 696 dona tarkibida kuchli taʼsir qiluvchi modda yoki ularning analoglari bo‘lgan dorilarning muomalaga kiritilishining oldi olindi. Bu haqda viloyat IIBB axborot xizmati xabar berdi.
Maʼlum qilinishicha, 1989 yilda tug‘ilgan fuqaro G.D.ning yashash xonadoni xolislar ishtirokida ko‘zdan kechirilgan. Natijada uy ichi va hovlidagi avtomashinada qora bozordagi narxi 200 mln so‘mga teng bo‘lgan 15 xil nom va ko‘rinishdagi 36 ming 696 dona kuchli taʼsir qiluvchi dori vositalari sotish maqsadida saqlab kelinayotgani aniqlanib, dorilar daliliy ashyo sifatida olindi.
Shundan so‘ng tezkor tadbir davom ettirilib, bu ayolga dori vositalarini yetkazib berayotgan taʼminotchi ham O‘zbekiston hududiga “tovar” bilan kirgan vaqtida IIBB xodimlari tomonidan qo‘lga olindi.
Aniqlanishicha, 1989 yilda tug‘ilgan E.O‘. (Qozog‘iston Respublikasi fuqarosi) 2 ming quti yoki 72 ming dona tarkibida kuchli taʼsir qiluvchi modda bo‘lgan dorilarni yashirin ravishda davlat chegarasidan olib o‘tgan.
Hozirda mazkur holat yuzasidan Jinoyat kodeksining 251-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) 3-qismi bilan jinoyat ishi qo‘zg‘atilib, tergov harakatlari o‘tkazilmoqda.
