Open budget: Toshkent viloyatida sim karta olish uchun o‘quvchilardan 10 ming so‘mdan pul yig‘ilgani aytilmoqda

 

Ijtimoiy tarmoqlarda tarqalgan videolar yuzasidan Toshkent viloyati hokimligi munosabat bildirdi.

 

Xabarda Toshkent viloyati Oqqo‘rg‘on tumani «Bayguli» MFYdagi 17-maktab o‘quvchilari darsga kiritilmay, sim karta sotib olish uchun 10 ming so‘mdan 20 ming so‘mgacha pul olib kelish uchun o‘z xonadonlariga jo‘natilayotganiga oid videolar tegishli tashkilotlar tomonidan o‘rganilayotgani maʼlum qilingan.

 

"Bugungi kunda keng ommalashib, xalq ovoziga aylanib borayotgan Open budget kampaniyasini bunday talqin qilish, bolalardan foydalanishni oqlab bo‘lmaydi.

Vaziyat viloyat hokimining o‘rinbosari Otabek Sultonbekov tomonidan nazoratga olindi va o‘rganish boshlandi", — deyiladi xabarda.

 

Qo‘shicha qilinishicha, Toshkent viloyati hokimligi yaqin soatlarda holat bo‘yicha batafsil va asoslantirilgan axborot beradi.