Lavrov AQSH davlat kotibi bilan WSJ jurnalistining hibsga olinishini muhokama qildi
Taʼkidlanishicha, AQSH elchixonasi muxbirning hibsga olingani haqida xabardor qilingan. Uning keyingi taqdiri sud tomonidan belgilanadi.
Rossiya tashqi ishlar vaziri Sergey Lavrov AQSH Davlat kotibi Entoni Blinken bilan Amerikaning "The Wall Street Journal" (WSJ) gazetasi jurnalisti Evan Gershkovichning hibsga olinishini muhokama qildi.
“Davlat kotibi tomonidan ayg‘oqchilikda gumon qilingan AQSH fuqarosi Evan Gershkovichning Rossiyada hibsga olinishi yuzasidan ko‘tarilgan muhokama kontekstida Entoni Blinkenning eʼtibori qonun va Rossiyaning xalqaro majburiyatlariga muvofiq qabul qilingan Rossiya rasmiylarining qarorlarini hurmat qilish zaruratiga qaratildi”, — deyiladi Rossiya TIV xabarida.
Davlat departamentining qayd etilishicha, Blinken suhbat davomida Gershkovichni, shuningdek, josuslikda ayblanayotgan yana bir amerikalik Pol Uilanni zudlik bilan ozod qilishni talab qildi. O‘z navbatida, Lavrov Vashingtondagi rasmiylarni va G‘arb OAVlarini bu ishga siyosiy tus berish maqsadida vaziyatni keskinlashtirmaslikka chaqirdi. Vazir Gershkovich jinoiy ish bilan qo‘lga olinganini taʼkidladi. Uning so‘zlariga ko‘ra, jurnalist o‘z maqomini niqob qilib, davlat sirini tashkil etuvchi maʼlumotlarni to‘plagan.
Tashqi ishlar vazirligining qo‘shimcha qilishicha, AQSH elchixonasi muxbirning hibsga olingani haqida xabardor qilingan, uning keyingi taqdiri sud tomonidan belgilanadi.
Suhbat chog‘ida Lavrov va Blinken ikki tomonlama xarakterdagi ayrim masalalarga ham to‘xtalib o‘tgan. Davlat departamentida taʼkidlanishicha, ular diplomatik missiyalar o‘z faoliyatini davom ettirish imkonini beruvchi muhitni yaratish muhimligini muhokama qilgan.
