Magniyga bo‘lgan kunlik ehtiyoji miqdori qancha?
Mutaxassis bu bo‘yicha maʼlumot berdi.
Magniy — salomatlik uchun o‘ta muhim mikroeliment. U organizmda energiya, oqsil, uglevod va yog‘ almashinuvini taʼminlovchi fermentlar faoliyatini muvofiqlashtirib turadi. Qolaversa, yurak ritmining buzilish xavfini kamaytirishi, tomirlarda qon ivishining oldini olishi bilan ahamiyatli.
Bu modda tanqisligi kuchli stress, ruhiy tushkunlik, bosh aylanishi va og‘rig‘i, sababsiz vahima, surunkali charchoq, uyqu buzilishi, xotira susayishi, meʼda-ichak spazmi, yurak urishining tezlashishi, qon bosimi oshishi yoki tushishi, mushaklar tortishishi singari belgilar bilan namoyon bo‘ladi.
Organizmning magniyga bo‘lgan kunlik ehtiyoji 300-350 milligrammga teng. Homiladorlik va boshqa holatlarda bu ko‘rsatkich yana-da ortishi tabiiy. Ushbu massa oziq-ovqat isteʼmoli orqali olinadi.
Yong‘oq, guruch, baliq, jigar, pishloq, grechixa yormasi, kunjut, qovoq, makkajo‘xori, boshoqli va dukkaklilar, meva-sabzavotlar mikroelementning asosiy manbayidir.
Biroq so‘nggi vaqtlarda fast food, gazli ichimliklar, shakar va tuzga boy hamda yarim tayyor mahsulotlar ovqatlanish ratsionimizdan keng o‘rin egallayotgani tufayli organizm yetarli miqdorda magniydan bahramand bo‘lmayapti.
Shuningdek, spirtli ichimliklariga ruju qo‘yish, chekish kabi zararli illatlar ham magniy tanqisligini keltirib chiqarmoqda.
Magniy yetishmasligi biriktiruvchi hujayralarning kuchsizlanishi singari og‘ir kasalliklarga olib kelishi mumkin. Bunday holatda shifokor tomonidan maxsus dori preparatlari tavsiya qilinadi.
