O‘zbekistonda ilk bor 1,5 yoshli bolaning umurtqasida murakkab operatsiya o‘tkazildi
Oldin bunday jarrohlik muolajalarini bajarish uchun bemorning balog‘at yoshiga yetishi kutilgan.
Respublika ixtisoslashtirilgan travmatologiya va ortopediya ilmiy-amaliy tibbiyot markazida ilk bor 1 yoshu 4 oylik bolaning ortiqcha yarim tana umurtqasini olib tashlash jarrohlik amaliyoti o‘tkazildi.
Bemor Muhammadusmon Ibragimov 2021 yilda Farg‘ona viloyatining O‘zbekiston tumanida tug‘ilgan. Dunyoga kelganida umurtqa pog‘onasida tug‘ma anomaliya borligi aniqlangan. Yaʼni umurtqa pog‘onasi ko‘krak-bel qismi sohasida qiyshiqlik, chap tomonda ko‘krak qafasining bo‘rtib chiqib qolishi kuzatilgan.
Vaqtinchalik muolajalardan so‘ng ota-onasi Respublika travmatologiya va ortopediya ilmiy-amaliy tibbiyot markaziga murojaat qildi.
Kerakli laborator va instrumental tekshiruvlardan so‘ng Muhammadusmonga “Umurtqa pog‘onasi tug‘ma rivojlanish anomaliyasi, umurtqa pog‘onasi ko‘krak-bel qismi tug‘ma skoliozi, ko‘krak va bel qismi shakllanishi buzilishi. Chap tomonlama VThX yarim umurtqasi” tashxisi qo‘yildi.
Muassasada VTh 12 yarim umurtqani olish, skoliotik deformatsiyasini korreksiyalash va endokorrektor bilan stabilizatsiya qilish operatsiyasi muvaffaqiyatli o‘tkazildi. Hozir bemorning ahvoli qoniqarli.
Markaz rahbari Murod Irismetovning taʼkidlashicha, avvallari bunday jarrohlik muolajalarini bajarish uchun bemorning balog‘at yoshiga yetishi kutilgan.
Oqibatda o‘tgan davrda butun umurtqa pog‘onasida og‘ir skoliotik deformatsiya yuzaga kelib, yakunda juda katta jarrohlik amaliyoti o‘kazilishiga to‘g‘ri kelgan. Bundan tashqari, bemorning ko‘krak qafasi organlarida ikkilamchi o‘zgarishlar paydo bo‘lgan. Bu esa ko‘pincha bemorning umrbod nogiron bo‘lib qolishiga olib kelgan.
Endi mazkur murakkab amaliyotning erta yoshda o‘tkazilishi yuqoridagi kabi asoratlar va tug‘ma nogironlikning oldi olinishiga xizmat qiladi.
