Xitoy Tayvan atrofida harbiy mashg‘ulot boshladi
Bu taqiqlangan uchrashuvga javob sifatida baholangan.
Tayvan rahbari AQSHga tashrif buyurib, Vakillar palatasi spikeri bilan uchrashganidan so‘ng Xitoy orol atrofida uch kunlik harbiy mashg‘ulotlar boshlanganini eʼlon qildi. Bu haqda CNN telekanali xabar bermoqda.
Qayd etilishicha, mashg‘ulotlar doirasida Tayvan bo‘g‘ozida hamda orolning shimoli-janubi va sharqida dengiz-havo kuchlari ishtirokida manevrlar o‘tkazish rejalashtirilgan.
Xitoyning eʼlonidan so‘ng Tayvan mudofaa vazirligi bo‘g‘ozda 42 ta Xitoy samolyoti qayd etilganini, ulardan 29 tasi shartli median chizig‘ini kesib o‘tib, havo hujumidan mudofaa identifikatsiya zonasiga kirganini aytdi.
Eslatib o‘tamiz, avvalroq Xitoy Qo‘shma Shtatlarda AQSH Kongressi Vakillar palatasi spikeri Kevin Makkarti va Tayvan prezidenti Say Ingven o‘rtasida o‘tkazilgan uchrashuvni qoralagandi.
