“Katta Langar Qurʼoni” sahifalari Parijdan Toshkentga yetib keldi — foto
Sahifalarni qabul qilish jarayonida ularning asl nusxaligi va yaxshi saqlangan holatda yetib kelgani maʼlum bo‘ldi.
Xabaringiz bor, o‘tgan 2022 yilning 24 noyabridan 2023 yil 6 martiga qadar Vazirlar Mahkamasi Madaniyat va sanʼatni rivojlantirish jamg‘armasining masʼulligida Fransiyaning Luvr muzeyida “O‘zbekiston vohalari xazinalari. Karvon yo‘llari chorrahasida” nomli ko‘rgazma o‘tkazildi.
Unda O‘zbekiston musulmonlari idorasi Kutubxonasi fondida saqlanayotgan “Katta Langar Qurʼoni”ning ikki sahifasi ham namoyish qilindi.
“Katta Langar Qurʼoni” sahifalari Fransiyadan Toshkent xalqaro aeroportiga joriy yil 23 mart kuni yetib keldi. Bojxona hujjatlari rasmiylashtirilgach, sahifalar joylashtirilgan quti ichki ishlar xodimlari hamrohligi va kuzatuvida Diniy idora kutubxonasiga yetkazildi.
Sahifalarni qabul qilish jarayonida ularning asl nusxaligi va yaxshi saqlangan holatda yetib kelgani maʼlum bo‘ldi va doimiy saqlov xonasiga joylashtirildi.
