Perevalda “Lacetti” xandaqqa tushib ketdi — video
FVV hodisa tafsilotlari haqida maʼlumot berdi.
Avvalroq, ijtimoiy tarmoqlarda haydovchi “ruchnoy” tormozni tortishni unutib qo‘ygani sabab avtomobil kanalga tushib ketgan haqida xabar berilgandi.
FVV maʼlum qilishicha, bugun, 10 aprel kuni ertalab “Toshkent – O‘sh” xalqaro avtomobil yo‘lining Qamchiq dovonidan o‘tuvchi 216-kilometrida yengil avtomobil ishtirokida YTH sodir bo‘lgan. Toshkentdan vodiy tomon harakatlanib ketayotgan “Lacetti” haydovchisi boshqaruvni yo‘qotishi oqibatida avtomobil xandaqqa tushib ketgan.
Zudlik bilan voqea joyiga FVV «Qamchiq» maxsus qidiruv, yong‘in-qutqaruv boshqarmasi xodimlari yetib kelgan. Qisqa vaqt mobaynida mashina yer yuzasiga ko‘tarilgan.
Hodisa vaqtida mashinada ikki kishi bo‘lib, ular jarohat olgan. Jarohatlanganlarga o‘z vaqtida tibbiy yordam ko‘rsatilgan.
FVVning qo‘shimcha qilishicha, YTH oqibatini bartaraf etish jarayonida dovonda avtomobillar harakati to‘xtatilmagan.
