Bekatdan "qo‘nim topgan" ayolga yordam ko‘rsatildi
O‘rganish jarayonida 60 yoshli ayolning doimiy yashash joyi yo‘qligi maʼlum bo‘ldi.
Joriy yilning 13 aprel kuni ijtimoiy tarmoqlarda poytaxtning Mirobod tumanidagi Markaziy univermag yaqinidagi avtobus bekatida ayol kishi yerda yotgani va u nogiron bo‘lishi mumkinligi haqida xabarlar tarqaldi.
Taʼkidlanishicha, ushbu xabar eʼlon qilinishidan avval, bu holat bo‘yicha ayolga yordam ko‘rsatilgan.
Shu kuni Mirobod tumani IIO FMB profilaktika inspektori o‘ziga biriktirilgan hududni ko‘zdan kechirayotgan vaqtida yerda yotgan ayolni ko‘rib qolgan. Ayol tibbiy yordamga muhtojligi sababli profilaktika inspektori tez-tibbiy yordam xizmatini chaqirtirgan.
O‘rganish jarayonida 60 yoshli M.A.ning doimiy yashash joyi yo‘qligi maʼlum bo‘ldi. Ayol tez-tibbiy yordam xizmati xodimlari tomonidan yaqin oradagi shifoxonaga olib borilgan va unga birinchi tibbiy yordam ko‘rsatilgan.
