Farg‘onada YPX xodimi Spark oynasini sindirdi
Maʼlum bo‘lishicha, haydovchi inspektorning qonuniy talabiga bo‘ysunmagan.
Ijtimoiy tarmoqda Farg‘ona viloyatining Uchko‘prik tumanida yo‘l patrul xizmati xodimi Spark avtomashinasi oynasini sindirganii aks etgan video tarqaldi. Holat yuzasidan viloyat IIB axborot xizmati maʼlumot berdi.
Holat bugun, 14-aprel kuni Uchko‘prik tumani Begobod qishlog‘i hududidan o‘tgan 4R-112 avtomobil yo‘lida yuz bergan. YPX inspektori A.A.ga davlat raqam belgisiz, yon oynalari tusi o‘zgartirilgan Spark rusumli transport vositasi harakatlanib borayotgani haqida xabar kelib tushgan.
Shundan so‘ng inspektor avtomobilni to‘xtatish choralarini ko‘rgan. Lekin haydovchi J.J. xodimning to‘xtash va avtomashinadan tushish haqidagi qonuniy talablariga bo‘ysunmagan. Ushbu vaziyatda xodim Ichki ishlar vazirligi buyruq talablariga asosan kuch ishlatib, avtomobil oynasini sindirib, haydovchini to‘xtatib qolgan.
“Holat yuzasidan haydovchi J.J.ga nisbatan Maʼmuriy javobgarlik to‘g‘risidagi kodeksning tegishli moddalari bilan hujjatlar rasmiylashtirilib, avtomobil jarima maydoniga joylashtirildi”, — deyiladi xabarda.
