Toshkentda fizika olimpiadasining final bosqichi bo‘lib o‘tdi
Unda respublikadan jami 255 nafar ishtirokchi qatnashgan.
Bugun, 15-apel kuni “Yangi O‘zbekiston” universitetida “Buyuk allomalar izidan” nomli fan olimpiadasi hamda Matematika xalqaro ilmiy konferensiyasi bo‘lib o‘tdi. Bu haqda universitet matbuot xizmati xabar bermoqda.
Sovrin jamg‘armasi 1 milliard so‘mlik “Buyuk allomalar izidan” nomli fizika fani olimpiadasining yakuniy final bosqichida barcha umumtaʼlim maktablari, akademik litseylar hamda kasb-hunar texnikumlarining bitiruvchi sinf o‘quvchilaridan saralangan 255 nafari ishtirokchi qatnashgan
Unda har bir ishtirokchiga 5 ta savoldan iborat bo‘lgan yozma ish taqdim etildi. Yozma ishlardan eng yuqori ko‘rsatkichni qayd etgan 1 nafar talabgor mutlaq g‘olib hamda keyingi o‘rinlardagi eng yuqori ko‘rsatkichlarni qayd etgan 10 nafar talabgor mutanosib ravishda sovrindorlar deb topildi.
Mutlaq g‘oliblikni qo‘lga kiritgan talabgor 20 million so‘m pul mukofoti, “Yangi O‘zbekiston” universitetida tahsil olish uchun bir yillik 100 foizlik grant (38 million so‘m) hamda boshqa sertifikat va medallar bilan taqdirlandi. 10 nafar sovrindorlar esa 2 milliondan pul mukofoti, “Yangi O‘zbekiston” universitetida tahsil olish uchun bir yillik 100 foizlik grant (38 million so‘m) hamda boshqa sertifikat va medallar bilan taqdirlandi.
Shuningdek, matematika sohasida olib borilayotgan ilmiy-tadqiqot ishlari samaradorligini oshirish hamda bu sohadagi olimlar fikr almashishi uchun maxsus maydoncha yaratish maqsadida “International Сonferenсe on Operator Algebras, Variyeties of Algebras and Related Topiсs” xalqaro ilmiy matematika konferensiyasi o‘tkazildi.
Konferensiyaga O‘zbekistonning yorqin matematik olimi, V. I. Romanovskiy nomidagi Matematika instituti direktori Sh. Ayupov va dunyo miqyosidagi mashhur matematik olimlardan biri Fransiyaning Strasburg universiteti Ilg‘or matematik tadqiqotlar instituti professori V. Dotsenko ishtirok etdi. Konferensiyaga xorijdan va respublika hududlaridan 50 ga yaqin professor-o‘qituvchi va tadqiqotchilar tashrif buyurdi. Tadbir ertaga ham davom etadi.
