Toshkentda giyohvand modda tarqatuvchilar ushlandi
Hozirda ularga nisbatan jinoyat ishi ochilgan.
Toshkent shahrining Uchtepa tumanida narkotik moddalarni yashirish («zakladka») bilan shug‘ullangan shaxslar qo‘lga olindi. Bu haqda IIV axborot xizmati xabar bermoqda.
Chilonzor-13 mavzesida 33 yoshli T.A. to‘xtatilib, xolislar ishtirokida o‘zi va unga tegishli Cobalt ko‘zdan kechirilganda, fuqaroning yonidan hamda avtomashinadan jami 5 dona o‘ramga qadoqlangan 5 gramm “marixuana” giyohvandlik moddasi topilgan.
Tekshiruv davomida ushbu giyohvandlik vositalari 23 yoshli Sh.U. tomonidan keyinchalik sotish uchun T.A.ga berilgani maʼlum bo‘lgan. Ko‘rilgan tezkor chora-tadbirlar natijasida Sh.U. ham huquqni muhofaza qiluvchi organlar tomonidan qo‘lga olingan. Ushbu fuqaro xolislar ishtirokida tekshirilganda, unda 29 dona o‘ramlarga qadoqlangan 35 gramm “marixuana” giyohvandlik moddasi borligi aniqlangan.
Holat yuzasidan Jinoyat kodeksining 273-moddasi bilan jinoyat ishi qo‘zg‘atilib, gumondorlarga nisbatan qamoqqa olish ehtiyot chorasi qo‘llangan. Hozirda tergov davom etmoqda.
