Myanma hukumati 3 ming 113 nafar mahbusni afv etdi
Afv etilganlarning 98 nafari xorij fuqarolaridir.
Reyter agentligining Telegram kanalida maʼlum qilinishicha, “Myanma xuntasi dushanba kuni mamlakatda Yangi yilni nishonlash uchun 3 ming 113 mahbusni, jumladan, 98 nafar xorijlikni afv etdi”.
Xabarda keltirilishicha, Myanma harbiy hukumati aynan qaysi mahbuslar amnistiyaga tushgani haqida aniqlik kiritmagan.
2022 yil noyabrda Myanma hukumati mamlakatda Milliy kuni bayrami sharafiga 300 dan ziyod mahbusni qamoqxonadan ozod qilgan edi. Ozod etilganlar orasida Myanma hukumatining sobiq maslahatchisi, avstraliyalik iqtisodchi olim doktor Shon Ternell hamda Buyuk Britaniyaning sobiq elchisi Viki Boumen va uning turmush o‘rtog‘i, Myanma fuqarosi Txeyn Lin ham bor edi.
Myanma qurolli kuchlari 2021 yil 1 fevralda fuqarolik hukumatini ag‘darib hokimiyatni o‘z qo‘liga olgan edi. Harbiylar o‘shanda hukumatni 2020 yilda bo‘lib o‘tgan umumiy saylov natijalarni o‘zlarining foydasiga o‘zgartirganlikda ayblagandi.
Konstitutsiya mexanizmi yordamida mamlakatda favqulodda holat eʼlon qilib hukumat tepasiga kelgan harbiylar bir yildan keyin saylov o‘tkazilishi va unda g‘olib bo‘lgan partiyaga hokimiyat topshirilishiga vaʼda bergan edi. Bahorda bo‘lib o‘tgan brifingda esa harbiy hukumatning rasmiy vakili general Zo Min Tun saylov kuni kelgusi ikki yil davomida maʼlum qilinishini aytgandi.
