Toshkentda ayol kishi nomidan akkaunt ochib, boshqalarni aldab yurgan erkak qo‘lga tushdi
Hozirda unga nisbatan jinoyat ishi qo‘zg‘atilgan.
Toshkent shahrida ayol kishi nomidan profil ochib, boshqalarni aldab yurgan erkak qo‘lga tushdi. Bu haqda IIV Kiberxavfsizlik markazi xabar bermoqda.
Olmazor tumanida yashovchi 33 yoshli erkak P.O. Telegram messenjeri orqali nomaʼlum akkaunt egasi uning pullarini talon-toroj qilganini maʼlum qilib, ushbu shaxsga nisbatan qonuniy chora ko‘rishlikni so‘ragan.
O‘tkazilgan tezkor-qidiruv tadbirlarida ushbu jinoyatni Uchtepa tumanida yashovchi, o‘zini sohibjamol ayol sifatida tanishtirgan shaxs — 29 yoshli erkak A.J. sodir etgani maʼlum bo‘lgan.
A.J. Telegram messenjerida P.O. bilan ayol sifatida tanishib, unga pul evaziga intim xizmat taklif qilgan va oldindan uning 500.000 so‘m pulini o‘zining bank kartasiga o‘tkazib olgan. Shundan so‘ng uning qo‘ng‘iroqlariga javob bermasdan, P.O.ning telefon raqamini “qora ro‘yxat”ga kiritib qo‘ygan.
Jinoyat sodir etgan A.J.ga nisbatan Jinoyat kodeksining 168-moddasi 3-qism «G» bandi bilan jinoyat ishi qo‘zg‘atilgan. Qonunga muvofiq, u sodir etgan jinoiy harakatlar uchun 5 yildan 8 yilgacha ozodlikdan mahrum qilish jazosi tayinlanishi mumkin.
