Afg‘onistonda korrupsiya ustidan g‘alaba qozonilgani aytildi
Bu haqda mamlakat Bosh vaziri ma’lum qildi.
“Tolibon” tomonidan tuzilgan Afg‘oniston Muvaqqat hukumati mamlakat bo‘ylab xavfsizlikni ta’minlab, korrupsiyani bartaraf etishga muvaffaq bo‘ldi. Bu haqda Bosh vazir Muhammad Xasan Oxundning Ramazon bayrami munosabati bilan xalqqa murojaatida aytiladi, deb ma’lum qildi hukumat matbuot xizmati.
“Afg‘oniston Islom Amirligi butun mamlakat bo‘ylab xavfsizlikni ta’minlab, dushmanlarning barcha makkor rejalarini barbod qildi. Barcha davlat muassasalari va Amirlik rahbariyatining eshiklari afg‘on xalqi uchun”, deb qo‘shimcha qildi Oxund.
19-aprel kuni “Tolibon” yetakchisi Haybatulloh Oxunzoda Ramazon bayrami munosabati bilan murojaatida, xususan, Afg‘oniston boshqa davlatlarning ichki ishlariga aralashish niyati yo‘qligini ta’kidlab, boshqa davlatlar ham ularning ichki ishlariga aralashmasliklarini so‘radi.
U, shuningdek, “Tolibon” rasmiylarini adolatli harakat qilishga va har qanday kamsitilishlardan qochishga chaqirdi.
