Surxondaryoda suv taʼminoti xodimlariga oylik berilmayotgani aytildi
Maʼlum qilinishicha, viloyatda suvdan qarzdorlik 55 mlrdga yetgan.
Ijtimoiy tarmoqlarda “Surxondaryo suv taʼminoti” MCHJ Boysun tuman bo‘limi xodimlariga ish haqi berilmayotgani haqida xabarlar tarqaldi. Holat yuzasidan «O‘zsuvtaʼminot» AJ rasmiy munosabat bildirdi.
Qayd etilishicha, bugungi kunda viloyat bo‘yicha ichimlik va oqava suvdan debitor qarzdorlik 55 mlrd 047 ming so‘mni tashkil etmoqda. Shundan aholi qarzdorligi 52 mlrd 247 mln so‘mni, yuridik va byudjet tashkilotlar qarzdorligi 2 mlrd 800 mln so‘mni tashkil qiladi. Bu esa jamiyat ishchi xodimlarining 22 oylik oylik ish haqqi fondiga yoki 12 oylik suv isteʼmoliga teng.
Taʼkidlanishicha, isteʼmolchilar to‘lovlarni o‘z vaqtida amalga oshirmagani bois tashkilot xodimlariga oylik maosh to‘lovlarida kechikish yuzaga kelmoqda. Hozirda ushbu to‘lovlarni amalga oshirish uchun kredit mablag‘lari jalb qilinmoqda.
“25 aprelga qadar tizimda faoliyat yuritayotgan xodimlar maoshi 1 aprel holatiga to‘liq to‘lab berish choralari ko‘rilmoqda”, — deyiladi xabarda.
