Prezident muftiy Nuriddin Xoliqnazarov bilan uchrashdi
Muloqotda diniy-maʼrifiy yo‘nalishdagi ishlar sarhisob qilingan.
Prezident Shavkat Mirziyoyev O‘zbekiston musulmonlari idorasi raisi, muftiy Nuriddin Xoliqnazarovni qabul qildi.
Muloqotda diniy-maʼrifiy yo‘nalishlarda, buyuk ajdodlar ilmiy merosini o‘rganish va xalqqa yetkazish borasida amalga oshirilayotgan ishlar sarhisob qilindi.
Bugungi tahlikali dunyoda xalqqa, ayniqsa, yoshlarga islom mohiyatini to‘g‘ri tushuntirib berish, jaholatga qarshi maʼrifat bilan kurashish har qachongidan dolzarb ahamiyat kasb etmoqda. Shu bois mamlakatda ijtimoiy-maʼnaviy muhit barqarorligini taʼminlash, diniy taʼlim sifatini yana-da oshirish, ushbu yo‘nalishdagi ilg‘or xalqaro tajribani o‘rganib, O‘zbekistondagi diniy taʼlim muassasalari faoliyatiga tatbiq etish bo‘yicha tizimli ishlar amalga oshirilmoqda.
Prezidentning 21 martdagi qaroriga muvofiq, mamlakatda muborak Ramazon oyi fayzli va shukuhli o‘tdi. Insonlarni yaxshilik va mehru saxovatga, bugungi tinch va osoyishta hayotni qadrlashga undaydigan maʼnaviy-maʼrifiy tadbirlar o‘tkazildi.
Davlat rahbarining tashabbusi bilan barcha imom-xatiblar ishtirokida mahallalardagi 1 milliondan ziyod kam taʼminlangan aholining uyida iftorliklar uyushtirildi. “Vaqf” xayriya jamoat fondi hisobidan yordamga muhtoj fuqarolarga 2 milliard 446 million so‘mlik xayru ehsonlar qilindi.
Bu yilgi Ramazon oyidagi yana bir muhim yangilik 1 ming 400 nafar kam taʼminlangan fuqarolarning davlat tomonidan umra ziyoratiga yuborilishi bo‘ldi. Ular muqaddas manzillarda turib, xalqqa tinchlik, fayzu baraka tilab xayrli duolar qildilar.
Prezident jamiyatda diniy bag‘rikenglikni yana-da mustahkamlash, fuqarolarning vijdon erkinligini kafolatlash bo‘yicha o‘z fikrlarini bildirdi.
