“Qizil kitobga” kiritilgan hayvonni ovlashga ruxsat berilgan edi
Tabiat resurslari vazirligi xodimi jamoatchilik eʼtiroziga sabab bo‘lgan vaziyatga oydinlik kiritdi.
Rossiyalik ovchi Sergey Mazurkevich Surxondaryoda “Qizil kitob”ga kiritilgan morxo‘r va arxar (tog‘ echkisi turiga mansub yovvoyi hayvon)ni otib o‘ldirib, jarayon videosini ijtimoiy tarmoqqa joylashtirgan edi. Ovchining harakatlari jamoatchilik eʼtiroziga sabab bo‘ldi.
Tabiat resurslari vazirligi Atrof muhit va tabiatni muhofaza qilish texnologiyalari ilmiy-tadqiqot instituti bo‘lim boshlig‘i O‘lmas Sobirovning aytishicha, Buxoro bug‘usining otilgani haqidagi mish-mishlar noto‘g‘ri. Aslida morxo‘r hayvoni 2022 yil noyabr oyida tegishli qonunchilik talablariga muvofiq ruxsatnoma asosida, yaʼni huquqiy jihatdan to‘g‘ri olingan.
2020 yilda qabul qilingan “Ov qilish va ovchilik xo‘jaligi to‘g‘risida”gi O‘zbekiston Respublikasi qonuni mavjud. Ushbu qonunning 20-moddasiga ko‘ra respublikamizdagi har bir yovvoyi hayvonot dunyosi, o‘simliklar obyektining kadastr hisoboti yuritiladi. Qonunchilik talablariga muvofiq berilgan buyurtma asosida shu hayvonning zaxirasi qanchalik mavjudligi o‘rganib chiqiladi. O‘rganib chiqilgach, tabiatdan olish mumkinligi to‘g‘risida xulosa beriladi. Vazirlar Mahkamasining qarori bilan tabiatdan bir dona hayvon ajratib olinadi.
