Toshkentda «moyka» uchun tashlab ketilgan Lacetti o‘g‘irlandi
20 yoshli yigit uni olib qochib, YTHga uchragan.
Toshkent shahrining Sergeli tumanidagi avtomoshina yuvish shoxobchasidan o‘g‘irlab ketilgan Lasetti yo‘l-transport hodisasiga uchragan holda topildi. Bu haqda IIV huzuridagi Tergov departamenti xabar bermoqda.
Qayd etilishicha, 35 yoshli A.A. 23 aprel kuni Sergeli–5 dahasi 2-metro bekati yonida joylashgan avtomashina yuvish shoxobchasi ishchisi — Iskandar ismli shaxsga Lasetti rusumli avtoulovini yuvish uchun kaliti bilan tashlab ketgan. Ertasi kuni u transport vositasini olib ketish uchun shoxobchaga kelgan vaqtida avtomashina hamda Iskandar ismli yigit bu yerda yo‘qligini ko‘rgan.
Olib borilgan tergov-tezkor harakatlar natijasida mazkur jinoyatni Andijon viloyatida yashovchi 20 yoshli U.I. sodir etgani maʼlum bo‘lgan. Jabrlanuvchiga tegishli avtomashina u tomonidan Toshkent viloyatining Ohangaron tumanida davlat raqamlari yechilgan va yo‘l transport hodisasiga uchragan holda tashlab ketilganligi aniqlangan.
Mazkur holat yuzasidan U.I.ga nisbatan Jinoyat kodeksning 267-moddasi 1-qismi (Transport vositasini olib qochish) bilan jinoyat ishi qo‘zg‘atilgan. Hozirda gumonlanuvchi U.I.ni qidirib topish ishlari olib borilmoqda. Tergov harakatlari davom etmoqda.
