Jamoat transportidagi kamchiliklar sabab ayrim masʼullar ishdan ketdi
Shuningdek, 10 nafar xodim hayfsan olgan.
1-may kuni «Toshshshahartransxizmat» AJ boshqaruv raisi, uning o‘rinbosarlari va avtobus saroyi rahbarlari ishtirokida so‘nggi kunlarda jamoat transporti tizimida yo‘l qo‘yilayotgan kamchiliklar, ijtimoiy tarmoqlarda muhokamalarga sabab bo‘layotgan muammolarni bartaraf etish yuzasidan tanqidiy muhokama yig‘ilishi o‘tkazildi.
Yig‘ilishda o‘z xizmat vazifasiga masʼuliyatsizlik bilan yondashgani, avtobuslar harakatini xavfsiz tashkil etish choralarini ko‘rish bo‘yicha haydovchilar o‘rtasida yetarli darajada yo‘riqnoma o‘tkazib tushuntirish ishlarini olib bormagani, avtobuslarda reklama bannerlarini joylashtirilishi va bartaraf etilishiga sovuqqonlik bilan yondashgani hamda yo‘nalishlarga chiqariladigan avtobus va elektrobuslarning ish tartibini to‘g‘ri tashkil etmaganligi sababli Avtobus saroyi masʼul xodimlariga qatʼiy chora ko‘rilib, xodimlar bilan tuzilgan mehnat shartnomasi bekor qilingan, ayrimlariga hayfsan intizomiy chorasi ko‘rilgan.
Jumladan, 2-Avtobus saroyi filiali direktori o‘rinbosari va harakat xavfsizligini nazorat qilish bo‘limi boshlig‘i bilan tuzilgan mehnat shartnomasi bekor qilingan, filial direktoriga hayfsan intizomiy chorasi ko‘rilgan.
1-Avtobus saroyi filiali direktori o‘rinbosari bilan tuzilgan mehnat shartnomasi bekor qilinib, filial direktoriga hayfsan intizomiy chorasi ko‘rilgan.
7-Avtobus saroyi filiali direktori o‘rinbosariga hayfsan intizomiy chorasi ko‘rilgan. Reklama joylashtirish bo‘yicha masʼul xodim bilan tuzilgan mehnat shartnomasi bekor qilingan.
1-, 2-, 5-, 7-, 8-, 12-, va 18-Avtobus saroyi filiallari bosh muhandislariga hayfsan intizomiy chorasi ko‘rilgan.
