Prezident MDH bosh kotibi bilan uchrashdi
Tashkilot rahbari O‘zbekiston xalqini referendum muvaffaqiyatli o‘tgani bilan qutladi.
Bugun, 1 may kuni Prezident Shavkat Mirziyoyev Konstitutsiya bo‘yicha referendumni kuzatuvchilar missiyasi boshchiligida O‘zbekistonda bo‘lib turgan Mustaqil Davlatlar Hamdo‘stligi bosh kotibi Sergey Lebedevni qabul qildi.
Davlat rahbari Hamdo‘stlik bosh kotibi va missiya aʼzolariga mamlakatning barcha hududlarida faol ishlagani hamda referendumning borishi va natijalariga yuksak baho bergani uchun samimiy minnatdorlik bildirdi.
Nufuzli mintaqaviy tashkilot rahbari, o‘z navbatida, O‘zbekiston yetakchisi va ko‘p millatli xalqini referendum jarayonlari yuksak xalqaro talablari va standartlariga muvofiq muvaffaqiyatli tashkil etilgani bilan dildan qutladi.
Referendum yakunlari Yangi O‘zbekistonni barpo etish va mamlakatda demokratik yangilanishlarni davom ettirishda muhim bosqich bo‘lishiga ishonch bildirildi.
Uchrashuvda o‘zaro manfaatli, eng avvalo, savdo-iqtisodiy, sanoat va transport sohalaridagi hamkorlikni mustahkamlashda MDHning muhim o‘rni qayd etildi. Hamdo‘stlik makonida investitsiyalar jadal surʼat bilan o‘sayotgani taʼkidlandi, joriy yilning mart oyida Samarqand shahrida o‘tgan Tashqi ishlar vazirlari kengashi majlisining samarali natijalari yuqori baholandi.
Faol gumanitar almashinuvlarni bundan buyon ham davom ettirishga alohida eʼtibor qaratildi.
