Buxoroda IIB xodimlari va soliqchi mushtlashdi

 

Ijtimoiy tarmoqlarda Buxoro viloyatining Olot tumanida IIB va soliq idorasi xodimlari o‘rtasida janjal yuz bergani aks etgan video tarqaldi. Holat bo‘yicha viloyat IIB rasmiy munosabat bildirdi.

 

Holat joriy yil 22-aprel kuni soat 16:00 larda YPX inspektorlari — katta serjant J.S. hamda safdor K.B. o‘zlarining xizmat hududi hisoblangan tuman markazidagi Maʼrifat ko‘chasida xizmat olib borayotgan vaqtlarida sodir bo‘lgan. Ular Nexia haydovchisi F.J. shu ko‘chani kesib o‘tuvchi yo‘lni ajratib turuvchi beton to‘siqqa urilib, unga shikast yetkazganiga guvoh bo‘lishgan va ushbu holatni rasmiylashtirish maqsadida hodisa joyiga zudlik bilan yetib kelishgan.

 

Shu vaqtda mazkur holatga umuman aloqasi va daxldorligi bo‘lmagan 1993 yilda tug‘ilgan, Buxoro viloyati Davlat Soliq boshqarmasi Qorako‘l tumani bo‘limi maʼmuriy amaliyot yuristi, Olot tumani “Chorbog‘” mahallasida yashovchi N.O‘. hodisa joyiga yetib kelib, hech bir sababsiz holatni rasmiylashtirayotgan IIB xodimlarining xizmat faoliyatiga faol qarshilik ko‘rsatgan. U xizmat vazifalarini bajarib turgan xodimlarni turli nojo‘ya so‘zlar bilan haqorat qilib, kuch ishlatgan va turli darajadagi tan jarohatlarini yetkazgan.

 

Janjal oqibatida katta serjant S.J.ning “o‘ng qo‘l 4-5 barmoqlarida hamda o‘ng qo‘l tirsak sohasida shilinma”, safdor B.K.ning esa “bo‘yin sohasida shilinma” kabi “sog‘liqning buzilishiga sababchi bo‘lmagan yengil shikast” toifasiga kiruvchi tan jarohatlari yetkazilganligi aniqlangan.

 

Mazkur holat sodir bo‘lgan vaqtda katta serjant S.J. hamda safdor B.K.lar hushyor holda xizmat vaqti hamda xizmat kiyimida bo‘lgan.

 

Hozirda ushbu holat yuzasidan Olot tumani prokuraturasi tomonidan Jinoyat Kodeksining 219-moddasi bilan jinoyat ishi qo‘zg‘atilib, ayblanuvchi N.O‘.ga nisbatan “uy qamog‘i” ehtiyot chorasi qo‘llanilgan holda dastlabki tergov harakatlari olib borilmoqda. 

 

“Tergov yakuni bo‘yicha ayblanuvchining harakatlariga huquqiy baho beriladi”, — deyiladi xabarda.