Farg‘onada uyida ko‘knori yetishtirgan shaxs aniqlandi
Hozirda unga nisbatan jinoyat ishi ochilgan.
Farg‘ona viloyatining Uchko‘prik tumanida yashash xonadonida giyohvandlik o‘simliklarni parvarishlab kelayotgan shaxs aniqlandi. Bu haqda viloyat IIB axborot xizmati xabar bermoqda.
Joriy yilning 19 aprel kuni o‘tkazilgan tezkor tadbir davomida tumanning “Farovon” MFY hududida yashovchi N.N.ning uyi xolislar ishtirokida ko‘zdan kechirilgan. Uning tomorqasida 27 tup ko‘knori o‘simliklari parvarishlab kelinayotgani aniqlanib, daliliy ashyo sifatida olingan.
Hozirda holat yuzasidan Jinoyat kodeksining 270-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.
Qonunchilikka ko‘ra, mazkur jinoyatni sodir etgan shaxs uch yilgacha ozodlikdan mahrum qilish bilan jazolanishi mumkin.
