O‘lim bilan qo‘rqitilgan jurnalist ishi bo‘yicha AOKA munosabat bildirdi
Agentlik holat yuzasidan BPga rasmiy xat yuborgan.
Mustaqil faoliyat ko‘rsatuvchi Nemolchi.uz loyihasining asoschisi, jamoatchilik faoli, jurnalist Irina Matviyenko ijtimoiy tarmoqlardagi sahifalari orqali unga o‘lim bilan tahdid qilingani tufayli O‘zbekistonni tark etganini maʼlum qildi. Mazkur holatga AOKA rasmiy munosbat bildirdi.
“Jurnalistlik faoliyatini himoya qilish to‘g‘risida”gi qonunning 10-moddasida, jurnalist o‘z kasbiga doir faoliyatni amalga oshirishida uning himoya qilinishini taʼminlashi lozimligi, shuningdek, ushbu qonunning 14-moddasida jurnalistning qonunda belgilangan huquqlarini buzganlik, uning hayoti, sog‘lig‘i va mol-mulkiga tahdid, zo‘ravonlik yoki tajovuz qilganlik qonun hujjatlariga muvofiq javobgarlikka sabab bo‘lishi belgilangan. Bu kabi himoyaviy kafolatlar “Ommaviy axborot vositalari to‘g‘risida”gi qonunning 5-moddasida ham o‘z ifodasini topgan.
AOKA bu kabi holatlarni so‘z va axborot erkinligini taʼminlash, jurnalistlarning erkin faoliyat ko‘rsatishi borasidagi yangicha ochiqlik siyosatiga zid xatti-harakatlar sifatida keskin qoralagan. Shunga ko‘ra, AOKA voqelikni o‘rganish hamda vaziyatga huquqiy baho berish uchun Bosh prokuraturaga ushbu masalani nazoratga olishni so‘rab rasmiy xat orqali murojaat qilgan.
Ayni paytda I.Matviyenkoning shaxsiy sahifasida eʼlon qilingan xabar huquqni muhofaza qilish organlari va mutasaddi idoralar tomonidan o‘rganilmoqda.
“Agentlik olib borilayotgan o‘rganish natijalarini diqqat bilan kuzatib boradi hamda jurnalist hayoti xavfsizligi taʼminlanishiga, shuningdek, qonunchilikka zid ravishda tahdid qilgan shaxslarga nisbatan qonuniy choralar ko‘rilishiga ishonadi”, — deyiladi munosabatda.
