Toshkentda atir sotuvchi ayollar odamlarni zaharlayaptimi?
Poytaxt IIBB tarmoqda tarqalgan xabarlarga munosabat bildirdi.
Ijtimoiy tarmoqlarda Toshkentda atir sotuvchi ayollar yurganligi, ular sotayotgan atirni hidlagan shaxs vafot etayotganligi haqida audioxabar tarqalib, turli muhokamalarga sabab bo‘lmoqda. Holat yuzasidan shahar IIBB axborot xizmati munosabat bildirdi.
Maʼlum qilishicha, mazkur xabar haqiqatga mutlaqo zid bo‘lib, bu kabi holatlar Toshkent shahrida qayd etilmagan, shu mazmundagi yolg‘on xabarlar bir necha yillardan beri ijtimoiy tarmoqlarda aylanib yurgan.
Shahar IIBB fuqarolardan asoslanmagan va tasdiqlanmagan xabarlarga ishonmaslikni hamda tarqatmaslikni so‘ragan.
