Ertaga “Yangi O‘zbekiston” ko‘chasi yopiladi
Mazkur ko‘chada xalqaro marafon o‘tkazilishi rejalashtirilgan.
Ertaga, 6-may kuni “Yangi O‘zbekiston” ko‘chasi vaqtincha yopiladi. Bu haqda Toshkent shahar hokimligi maʼlum qildi.
Qayd etilishicha, “Yangi O‘zbekiston” bog‘i va unga tutash hududda “Sity run” havaskorlar uchun xalqaro yugurish musobaqasi bo‘lib o‘tadi. Shu munosabat bilan 6 may kuni soat 17:30 dan 20:00 ga qadar “Yangi O‘zbekiston” ko‘chasining “Jasorat” ko‘chasi bilan kesishmasidan Chirchiq daryosi ko‘prigigacha bo‘lgan qismi transport vositalarining harakati uchun yopiladi.
“Haydovchilardan noqulayliklar uchun uzr so‘raymiz va aylanma ko‘chalardan foydalanishni tavsiya qilamiz”, — deyiladi xabarda.
