“Ko‘zmunchoq” rahbari “ko‘zmunchog‘i” sabab ishdan olindi
Toshkent shahar Chilonzor tumanidagi bog‘cha rahbari xizmat vazifasidan ozod qilinganligi haqida Maktabgacha va maktab taʼlimi vazirligi xabar berdi.
Toshkent shahrining Chilonzor tumanidagi bolalar bog‘chasida to‘rt nafar qizchaga tegajog‘lik qilingani, bunda bog‘cha direktorining 15 yoshli o‘g‘li ayblanayotgani to‘g‘risida xabar berilgandi. Maktabgacha va maktab taʼlimi vazirligining maʼlum qilishicha, bog‘cha direktori bilan mehnat shartnomasi bekor qilingan.
“Chilonzor tumanidagi 230-maktabgacha taʼlim tashkiloti direktori bog‘cha hududiga begona shaxsni kirishiga yo‘l qo‘yib bergani, tarbiyalanuvchi bolalar hayotini xavf ostiga qo‘ygani, ichki mehnat tartib-qoidalarini buzgani va o‘z xizmat vazifasiga masʼuliyasizlik bilan yondashgani sababli u bilan tuzilgan mehnat shartnomasi Mehnat kodeksining 161-moddasi ikkinchi qismi 5-bandiga asosan bekor qilindi”, — deyiladi xabarda.
Ayni damda holat yuzasidan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish) orqali 119-moddasi (jinsiy ehtiyojni zo‘rlik ishlatib g‘ayritabiiy usulda qondirish) bilan jinoyat ishi qo‘zg‘atilgan.
Poytaxt IIBB mazkur holat nazoratga olingani va tekshiruv yakuni bo‘yicha qonuniy qaror qabul qilinishini bildirgan. Bosh prokuratura ham mazkur voqea yuzasidan munosabat bildirib, holat nazoratga olinganini, natijalari haqida qo‘shimcha axborot berilishini maʼlum qildi.
