Toshkent yashab bo‘lmaydigan darajaga aylantirilyaptimi?
Vazirlik poytaxtda noqonuniy qurilayotgani aytilgan obyektga izoh berdi.
Ijtimoiy tarmoqlarda “Poytaxtni yashab bo‘lmaydigan darajaga aylantirish davom etmoqda" sarlavhasi ostida Toshkent shahrining Yangihayot tumanida noqonuniy qurilish boshlangani haqida maqola eʼlon qilindi. Mazkur maqolaga Qurilish vazirligi rasmiy munosabat bildirdi.
Maʼlum qilinishicha, Yangihayot tumani 2-qurilish hududidagi “Yangi Umid” MFYda bunyod etilishi boshlangan mazkur obyekt tadbirkorga tegishli noqonuniy bino emas, balki davlat dasturi asosida “Yangi Umid” mahallasi aholisining turmush darajasini yana-da yaxshilashga yo‘naltirilgan sport obyekti hisoblanadi.
Ushbu hududda Prezidentning “2022-2023 yillarda mahallalar infratuzilmasini yana-da yaxshilash bo‘yicha qo‘shimcha chora-tadbirlar to‘g‘risida”gi 408-sonli qaroriga muvofiq tasdiqlangan konsepsiya asosida “Sport sog‘lomlashtirish markazi”ni qurish ishlari amalga oshirilmoqda.
“Obyektdagi qurilish-montaj ishlarini tashkil etishda tegishli arxitektura va qurilish tashkilotlari bilan kelishilgan hamda belgilangan tartibda ijobiy ekspertiza xulosasi olingan. Shuningdek, Toshkent shahar Qurilish sohasidagi hududiy nazorat inspeksiyasidan ro‘yxatdan o‘tgan”, — deyiladi xabarda.
