Farg‘onada 200 tonnalik paxta o‘ramida yong‘in chiqdi
Holat bo‘yicha viloyat FVB maʼlumot berdi.
Kecha, 9-may kuni Farg‘ona viloyatining Oltiariq tumanida joylashgan paxta saqlash punktida yong‘in sodir bo‘ldi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, soat 11:05 da Oltiariq tumani “Ibn Sino” MFY hududidagi xususiy korxonaga qarashli paxta buntida yong‘in sodir bo‘layotganligi to‘g‘risida FVBga xabar kelib tushgan.
Xabarga asosan yong‘in-qutqaruv ekipajlari soat 11:10 da yetib borgan, yong‘in 11:13 da o‘rab olinib, 11:30 da to‘liq o‘chirilgan.
Yong‘in oqibatida 1 dona 200 tonnalik paxta buntida 500 kilogramm paxta yonib zararlangan. Yong‘indan 1 dona buntdan 199,5 tonna paxta saqlab qolingan.
Hodisa oqibatida tan jarohati olganlar yo‘q. Hozirda yong‘inning kelib chiqish sababi va zarar miqdori aniqlanmoqda.
