Prezident Shayxontohurdagi xususiy maktabga bordi
Davlat rahbari tashrif davomida o‘quvchilar bilan muloqot qildi.
Prezident Shavkat Mirziyoyev Toshkent shahrining Shayxontohur tumanidagi nodavlat taʼlim muassasasini borib ko‘rdi.
Ming o‘rinli bu maktab ingliz tili, sharq tillari va aniq fanlarni o‘rgatishga ixtisoslashgan. Muassasada o‘quv va kompyuter xonalari, STEM laboratoriyasi, kutubxona, oshxona, sport zali, basseyn mavjud.
Maktabdagi o‘quv va mashg‘ulotlar yoshlarni kamida ikkita xorijiy til va bitta hunarga o‘rgatish talabiga mos. Maxsus jihozlangan xonalarda o‘quvchilar tikuvchilik, duradgorlik, kompyuter sirlarini o‘rganmoqda. Yoshlarning qiziqishlariga mos turli to‘garaklar ham tashkil etilgan.
Prezident ushbu maktab tajribasi asosida kichik hududda ko‘p o‘quvchi o‘rinlarini yaratish, nodavlat maktablarda taʼlim sifatini nazorat qilish muhimligini taʼkidladi.
O‘quvchilar bilan muloqotda bilim eng yaxshi investitsiya ekani, davlat yoshlarning zo‘r mutaxassis bo‘lib, kelajakda yo‘lini topishi uchun barcha sharoitlarni yaratishi qayd etildi.
