Mastercard O‘zbekistonda vakolatxonasini ochmoqchi
Bu haqda kompaniya vakillari eʼlon qilishdi.
Kecha, 16-may kuni Raqamli texnologiyalar vazirining birinchi o‘rinbosari Oleg Pekos Mastercard kompaniyasining Sharqiy Yevropa, Yaqin Sharq va Afrika mintaqasi bo‘yicha prezidenti Dimitrios Dozis boshchiligidagi delegatsiya vakillari bilan uchrashdi.
Uchrashuvda tomonlar raqamlashtirish, kichik va o‘rta biznesni qo‘llab-quvvatlash va O‘zbekistonda IT-autsorsing markazlari, BPO va KPO sohalarini yana-da rivojlantirishda hamkorlikni muhokama qilgan.
Shuningdek, Mastercard O‘zbekistonda o‘z vakolatxonasini ochish rejasini eʼlon qilgan, bu ularning mamlakat raqamli infratuzilmasini rivojlantirishga qiziqishini ifodalaydi.
“O‘zbekistonda Mastercard vakolatxonasining ochilishi hamkorlik aloqalarini yana-da rivojlantirish va kompaniya xizmatlarini kengaytirishga xizmat qiladi. Bu mahalliy biznes va davlat organlari bilan hamkorlik qilish uchun yangi imkoniyatlar yaratadi, shuningdek, O‘zbekistonning mintaqaviy va xalqaro miqyosda raqamli iqtisodiyot markazi sifatidagi mavqeini mustahkamlaydi”, — deyiladi xabarda.
