O‘zbekistonda 60 yoshdan oshganlarga xavfli dori berilyaptimi?
SSV tarmoqda tarqalgan xabarlarga munosabat bildirdi.
Ijtimoiy tarmoqlarda O‘zbekiston Xitoydan katta miqdorda dori vositalari sotib olgani, tabletka ko‘rinishidagi ushbu preparatlar mamlakat bo‘ylab 60 yoshdan oshgan aholi vakillariga berilishi, ammo ular inson organizmi uchun xavfli ekani haqida xabarlar tarqalmoqda. Sog‘liqni saqlash vazirligi holatga rasmiy munosabat bildirdi.
Maʼlum qilinishicha, O‘zbekistonga Xitoy davlatidan katta miqdorda dori vositalari olib kelingani haqidagi xabarlar mutlaqo yolg‘on.
Qolavera, bundan 2 yil avval mamlakatda koronavirus pandemiyasi ayni avj olgan og‘ir va murakkab davrda ham internet tarmoqlarida COVID-19 infeksiyasiga qarshi ishlab chiqarilgan vaksinalar to‘g‘risida shu singari haqiqatga zid maʼlumotlar tarqatilgan. Biroq oradan vaqt o‘tib, ushbu xabarlar mutlaqo uydirma ekani maʼlum bo‘lgan.
“Shu maʼnoda aytsak, odamlar orasida turli vahima va xavotir uyg‘otish maqsadida tarqatilayotgan bu galgi xabarlar ham bo‘xton va safsatadan boshqa narsa emas”, — deyiladi xabarda.
