"Mass-media sohasiga oid 100 savol" loyihasi taqdimoti bo‘lib o‘tdi
Onlayn platforma Milliy Mass-mediani qo‘llab-quvvatlash va rivojlantirish jamoat fondi hamda Shveysariya taraqqiyot va hamkorlik Agentligi bilan birgalikda ishlab chiqildi.
Mazkur loyiha OAV tashkil etish istagida bo‘lgan, lekin OAVni ro‘yxatdan o‘tkazish va faoliyatini tashkil etish tartibini bilmaydigan, shuningdek, bu borada qaysi tashkilotga murojaat qilish kerakligi haqida aniq tasavvurga ega bo‘lmagan fuqarolar (blogerlar, tashabbuskor guruhlar) toifasiga mo‘ljallangan.
"Ushbu loyiha uchun savollar to‘g‘ridan-to‘g‘ri amaliy tajribaga ega bo‘lgan jurnalist va blogerlardan to‘plangan. Uning asosiy maqsadi OAV xodimlarining huquqiy savodxonligini oshirish orqali milliy media loyihalarining mustaqilligini mustahkamlashga ko‘maklashishdan iborat", — dedi Mass-media fondi Vasiylik kengashi raisi Nozima Davletova.
Loyiha doirasida to‘plangan barcha savollar “Legalmax” yuridik firmasi huquqshunoslari tomonidan umumlashtirilib, tizimlashtirilgan.
Maʼlumotlarni izlash qulay bo‘lishi uchun javoblar 5 ta alohida tematik bloklarga bo‘lingan holda Milliy Mass-mediani qo‘llab-quvvatlash va rivojlantirish jamoat fondining veb-saytida o‘zbek va rus tillarida berilgan.
Kelajakda Android va iOS tizimlari uchun mobil ilova va Telegram boti ishga tushirilishi maʼlum qilindi.
