Qo‘qonda qizlarning yotoqxonasiga kamera o‘rnatganlar javobgarlikka tortildi
Avvalroq mazkur ish sabab Qo‘qon davlat pedagogika instituti prorektori va yana 4 nafar masʼul xodim ishdan olingandi.
Joriy yilning aprel oyida Qo‘qon davlat pedagogika institutining talabalar yotoqxonasidagi holat yuzasidan sud hukmi 5 may kuni chiqarilgan.
Unga ko‘ra, Qo‘qon davlat pedagogika institutining Yoshlar masalalari va maʼnaviy-maʼrifiy ishlar bo‘yicha birinchi prorektori O.B. MJtKning 46-1-moddasi(shaxsiy hayot daxlsizligini buzish)da ko‘rsatilgan maʼmuriy huquqbuzarlikni sodir etgan deb topilib, unga bazaviy hisoblash miqdorining 15 baravari, yaʼni, 4 500 000 so‘m jarima jazosi tayinlangan.
Shuningdek, institutning taʼlim texnologiyalari markazi xodimlari A.M., B.O. va bo‘lim boshlig‘i R.M. ham MJtKning 46-1-moddasida ko‘rsatilgan maʼmuriy huquqbuzarlikni sodir etgan deb topilib, ularning har biriga bazaviy hisoblash miqdorining 10 miqdorida yaʼni, 3 000 000 so‘mdan jarima jazosi tayinlangan.
Eslatib o‘tamiz, Qo‘qon davlat pedagogika institutining yotoqxonasida talaba qizlar yashaydigan xonaga yashirin videokamera o‘rnatilgani ortidan institutining prorektori va yana 4 nafar masʼul xodim ishdan olingandi.
