Rossiyadagi o‘zbekistonliklar huquqlari himoyachisi 14 yilga ozodlikdan mahrum qilindi
Bahrom Hamroyevning o‘zi bu daʼvolarni rad etgan.
Rossiyadagi o‘zbekistonliklar huquqlari himoyachisi Bahrom Hamroyev 14 yilga ozodlikdan mahrum qilindi. Bu haqda TASS xabar berdi.
Xabarga ko‘ra, Rossiyaning ikkinchi G‘arbiy okrug harbiy sudi Hamroyevni terrorizmni oqlash va terrorchilik faoliyatini tashkil etishda aybdor deb topgan. Sud jarayonida prokuror unga nisbatan 21 yillik qamoq jazosi berishni so‘ragan.
Shuningdek, huquq himoyachisi Rossiya Jinoyat kodeksining 205,2-moddasi 2-qismi (terrorizmni ommaviy oqlash) va 205,5-moddasining 1-qismi (Rossiya Federatsiyasi qonunchiligiga muvofiq terrorchi deb topilgan tashkilot faoliyatini tashkil etish) bo‘yicha aybdor deb topilgan. U o‘zini “Memorial” (xorijiy agentlik tashkiloti deb tasniflangan) va “Grajdanskoye sodeystviye” (xorijiy agentlik tashkiloti deb tasniflangan) tashkilotlari bilan hamkorlik qilishini tan olgan.
Tergov maʼlumotlarida Hamroyevning “Hizb ut-tahrir” terrorchi tashkiloti hamda O‘zbekistonda Adliya vazirligi ro‘yxatidan o‘tmagan “Birlik” partiyasiga aʼzo ekani qayd etilgan. Bahrom Hamroyevning o‘zi bu daʼvolarni rad etgan.
