Soxta Prezident administratsiyasi xodimlari ushlandi
Uchko‘prik tuman hokimi lavozimiga tayinlash evaziga 80 ming AQSH dollari talab qilgan shaxslar qamoqqa olindi.
IIV Matbuot xizmatining maʼlum qilishicha, joriy yilning 18 may kuni IIVga Farg‘ona viloyati Uchko‘prik tumanida yashovchi fuqaro ariza bilan murojaat qilgan.
Uning qayd etishicha, shu yilning aprel oyida o‘zini Prezident administratsiyasi xodimi sifatida tanishtirgan shaxs va uning sherigi Farg‘ona viloyatining Uchko‘prik va Beshariq tumanlari referendum o‘tganidan so‘ng lavozimidan bo‘shatilishini, ularning o‘rniga nomzod qidirib yurishganini aytishgan.
Ular ariza muallifini Uchko‘prik tumaniga hokim etib tayinlash evaziga 80 ming AQSH dollari, shundan hujjatlarni rasmiylashtirish evaziga oldindan 25 ming AQSH dollari talab qilishgan.
Arizaga asosan o‘tkazilgan tezkor tadbirda Mirobod tumanida ikki nafar shaxs ariza muallifidan 25 ming AQSH dollarini olgan vaqtda ushlanganlar. Ularning yonidan bir necha fuqarolarning rahbar lavozimlariga tayinlash uchun Prezident administratsiyasiga yozgan arizalari tekshirish uchun olingan.
Mazkur holat yuzasidan JKning 168-moddasi 4-qismi “a” bandi va 211-moddasi “a” bandi bilan jinoyat ishi qo‘zg‘atilib, gumonlanuvchilar qamoqqa olingan.
