Toshkentda terrorchilik tashkilotining 8 nafar yashirin aʼzosi ushlandi
Bu haqda poytaxt IIBB xabar berdi.
Toshkent shahrida terrorchilik tashkilotining bir guruh yashirin aʼzolari qo‘lga olindi. Bu haqda poytaxt IIBB axborot xizmati xabar berdi.
2023 yilning 20 may kuni, huquqni muhofaza qiluvchi idoralar hamkorligida «Tavhid va jihod katibasi» («TJK», O‘zbekiston Respublikasi Oliy sudining 2016 yil 26 sentyabrdagi qarori bilan terroristik tashkilot deb topilib, mamlakatimiz hududida uning faoliyati taqiqlangan) nomli terrorchilik tashkilotining 8 nafar yashirin aʼzolari ushlandi.
Ular Toshkent shahri hududida jamoaviy yig‘inlar o‘tkazib, kelgusida Suriya davlati hududida faoliyat yuritayotgan terrorchilik tashkilotlarining safiga borib qo‘shilishni rejalashtirib, terrorchilik tashkiloti yetakchilari bilan internet tarmog‘i va turli ijtimoiy messenjerlar orqali aloqa o‘rnatib, ularning ko‘rsatmalari asosida aholi orasida tashkilot g‘oyalarini targ‘ib qilish va tashkilot safini kengaytirish bilan shug‘ullanib kelgan.
Hozirda mazkur holat yuzasidan Toshkent shahar IIBB huzuridagi Tergov boshqarmasi tomonidan O‘zbekiston Respublikasi Jinoyat Kodeksining tegishli moddalari bilan jinoyat ishi qo‘zg‘atilib, gumon qilinuvchilarga nisbatan qamoq tarzidagi ehtiyot chorasi qo‘llangan. Tergov harakatlari davom etmoqda.
