“Ali bobo va qirq qaroqchi” filmining yangi talqini yaratiladi
Uni suratga olishning amaliy masalalari iyulda ko‘rib chiqiladi.
O‘zbekiston, Rossiya va Hindiston birgalikda “Ali bobo va qirq qaroqchi” filmining zamonaviy talqinini yaratadi. Bu haqda Kinematografiya agentligi maʼlum qildi.
Agentlik va «O‘zbekfilm» davlat unitar korxonasi rahbariyatining rossiyalik rejissyor Jahongir Fayziyev va hindistonlik rejissyor va ssenariylar muallifi Umesh Mehra bilan onlayn-uchrashuvi bo‘lib o‘tdi.
Unda O‘zbekiston-Rossiya-Hindiston hamkorligidagi loyiha – afsonaviy “Ali bobo va qirq qaroqchi” filmining zamonaviy talqinini yaratish fikri ko‘rib chiqildi. Shuningdek, tashkiliy masalalar, aktorlarni tanlash va filmning taxminiy budjeti muhokama qilindi.
Jahongir Fayziyev 1979 yilda suratga olingan “Ali bobo va qirq qaroqchi” filmi rejissyori Latif Fayziyevning jiyani hisoblanadi.
Uchrashuvda suratga olinishi rejalashtirilgan kartina kambag‘al o‘tinchi Ali Bobo haqidagi afsonaning birinchi qismini davom ettirish va zamonaviy talqinda suratga olinish kerakligi qayd etildi.
Kinolentani yaratishning barcha amaliy masalalarini iyul oyida ko‘rib chiqishga kelishib olindi.
