O‘zbekistonda 4 oyda besh yuzga yaqin kishi YTH qurboni bo‘ldi
Respublikada yanvar-aprel oylarida jami 2144 ta YTH qayd etilgan.
Senatning Mudofaa va xavfsizlik masalalari qo‘mitasida 26-may kuni Prezidentning «Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida»gi qarori ijrosi yuzasidan amalga oshirilayotgan ishlar holati to‘g‘risida mas’ul vazirlik va idoralar rahbarlarining axboroti eshitildi. Bu haqda Senat axborot xizmati xabar berdi.
Tadbirda avtomobil yo‘llarida transport vositalarini o‘tkazuvchanlik qobiliyatini yaxshilash maqsadida Qoraqalpog‘iston Respublikasi, viloyatlar va Toshkent shahriga 2023-yilda jami 707 ta transport va 298 ta piyodalar svetoforini o‘rnatish hamda 404 ta svetoforni (348 ta transport, 56 ta piyoda) rekonstruksiya qilish belgilangani ta‘kidlandi. Shuningdek, O‘zbekiston Respublikasining Jinoyat, Jinoyat-protsessual hamda Ma’muriy javobgarlik to‘g‘risidagi kodekslarini takomillashtirishga qaratilgan qonun loyihasi ishlab chiqilib, parlament muhokamasiga kiritilgan bo‘lishiga qaramasdan qaror ijrosini ta’minlashda ayrim kamchiliklar ham mavjudligi aytildi.
Xususan, qarorda belgilangan vazifalar ijrosi tegishli hududiy maxsus komissiyalar tomonidan to‘liq ta’minlanmasligi hamda harakat xavfsizligini ta’minlash bilan bog‘liq masalalar xalq deputatlari mahalliy Kengashlari muhokamasiga muntazam tarzda kiritilmasligi oqibatida 2022-yilda respublikada 9902 ta yo‘l transport hodisasi sodir bo‘lgan hamda ularda 9606 nafar fuqaro jarohatlangan va 2356 nafar fuqaro halok bo‘lgan.
Bundan tashqari, republika bo‘ylab 2023-yilning dastlabki 4 oyi davomida 2144 ta yo‘l transport hodisasida 499 nafar fuqaro hayotdan ko‘z yumgan.
